बहुआयामी अभिनेता आयुष संजीव आपल्या विविध भूमिकांमुळे आणि विविध कामांमुळे नेहमीच चर्चेत राहिला आहे. बॉस माझी लाडाची, ३६ गुणी जोडी यासारख्या मालिकांमधून त्याने अभिनेता म्हणून प्रेक्षकांच्या मनात आपले अढळ स्थान निर्माण केले. तर हळद लागली भावाला, नाच गो बया सारख्या गाण्यांमधून त्याने त्याच्या नृत्याची जादू पसरवली. यावेळीही सोशल मिडीयावर आयुषची तूफान चर्चा होत असल्याचे पाहायला मिळत आहे. मात्र यावेळी चर्चेचा आणि काही प्रमाणात ट्रोलिंगचा विषय आहे तो म्हणजे आयुषने त्याच्या नुकत्याच पोस्ट केलेल्या रील मधील त्याने परिधान केलेला कुर्ता. नक्की काय आहे हे सगळं ?
आयुष संजीव आणि मराठी बिग बॉस ५ फेम अभिनेत्री इरिना रुडाकोवा, निक शिंदे यांचं नवीन गाणं ‘मराठी ठेका’ नुकतच युट्युबवर प्रदर्शित झालं आहे. याच गाण्यावर ठेका धरत आयुष व इरिनाने एक रील शेअर केले आहे. यामध्ये आयुषने परिधान केलेला कुर्ता काखेत उसवला आहे आणि नेमकी हीच गोष्ट नेटकऱ्यांनी हेरली व काहींनी यासाठी ट्रोलिंग सुरू केले. मुळात झाले असे की या रील साठी स्टेप्सची प्रॅक्टीस करत असताना आयुषचा कुर्ता काखेत उसवला पण केवळ आयुष व इरिनाच नाही तर संपूर्ण संघच गाण्यासाठी, रील शूट करण्यासाठी खूप मेहनत करत असल्यामुळे आयुषने सांगितले की आपण मेहनतीने, पूर्ण समर्पणाने आपले काम करत असताना तो कुर्ता फाटला आहे तर तो तसाच असूदे आपण असेच शूट करूया.
आयुषच्या या निर्णयाचे त्याच्या टीम आणि चाहत्यांकडून कौतुकच झाले परंतु काही लोकांनी मात्र आयुषला ट्रोल करण्याकडे आपला मोर्चा वळवला. त्यात अनेकांनी त्याला हे मुद्दाम सांगितले की कुर्ता फाटला आहे परंतु अनेक चाहत्यांनी त्याचे व इरिनाचे नृत्य उत्तम झाले आहे हे देखील आवर्जून सांगितले. एका नेटकऱ्याने कुर्ता फाटला आहे, व्हिडीओ डिलिट कर हे सांगितले असता संगीतकार प्रशांत नाकती यांनी त्या ट्रोलरला नम्रपणे पण रोखठोक उत्तर देत सांगितले की “हो Shoot करताना कुर्ता फाटला, अंधार पडत होता, वेळ कमी होता, त्याने स्वतःच निर्णय घेतला आणि सांगितले की, “कुर्ता फाटलाय, पण तो Dance करताना, मेहनत करताना फाटलाय, त्यामुळे शूट थांबवू नका, मला काही हरकत नाही”. तो बेधुंद होऊन नाचत होता, मनापासून नाचत होता. आज त्याने रील सुद्धा टाकली, कारण तो त्याच्या कामाला घेऊन प्रामाणिक आहे.”
आजच्या काळात जेव्हा लोकं आपल्या दिसण्याला, कपड्यांना आणि इतर गोष्टींना अती महत्व देतात अशा वेळी आयुष संजीव सारखे हाडाचे मराठी कलाकार जेव्हा इतर कोणत्याही वरवरच्या गोष्टींपेक्षा आपल्या कलेला तसेच प्रेक्षकांचे मनोरंजन करण्याला अधिक प्राधान्य देतात तेव्हा ती खरच अभिमानाची गोष्ट आहे. मराठी ठेका हे दमदार मराठी गाणं Prashant Nakti Official या युट्युबवर चॅनलवर प्रदर्शित झालेले आहे, नक्की पहा.
